Ákæruvaldið kravdi 200.000 kr. í bót

Ákæruvaldið kravdi 200.000 kr., tí talan var um skerpaðar umstøður. Vanliga bótin er 100.000 kr., men Føroya rættur gav skiparunum á Gadusi, Nærabergi, Vesturvón og Finni Fríða 150.000 kr. í bót fyri at fiska makrel í stongdum kassa norðanfyri.

Reiðskapur fyri fýra mió. 

Ákæruvaldið kravdi eisini, at skipini mistu reiðskap fyri góðar 3,7 mió. kr.  Men rætturin sigur, at reiðskapur fyri eina millión og 336.000 kr. var ólógligur. Bara reiðskapurin, sum varð brúktur til makrelfiskiskapin, er drigin inn. 

Føroya rættur gav ikki ákæruvaldinum viðhald í, at hin reiðskapurin, sum var umborð, skuldi konfiskerast. Men veiðan hjá skipinum, sum verð mett at vera verd 830.000 kr., er eisini drigin inn. Sambært dóminum skulu skipararnir og reiðaríini bera hvør sína helvt av sakarkostnaðinum.