Manningarfeløg: Politikarar eiga at leggja uppí

Manningarfeløgini vilja hava politikararnar at leggja seg út í sáttmálaviðurskiftini á arbeiðsmarknaðinum.

Tey trý feløgini vilja hava landsstýrið og løgtingið at tryggja, at øll manning á føroyskum fiskiskipum verður lønt eftir sáttmálum millum reiðararnar og føroysku manningarfeløgini. Besta leiðin at røkka tí málinum alt fyri eitt er at fáa sett sum treyt, at bara fiskifør, har sum manningin fær hýru sambært sáttmála hjá manningarfeløgunum, fáa fiskiloyvi. 

Harfturat vilja manningarfeløgini sum skjótast hava sett í fiskivinnulóggávuna, at øll skip, sum brúka føroysk fiskirættindi, kunnu bara mannast við fólki, sum verða sett og lønt eftir føroyskum manningarsáttmálum. 

Uppskot frá Javnaðarflokkinum 

Løgtingið fer at viðgera spurningin, tá triðja várið á rað roynir Javnaðarflokkurin at fáa løgtingið at broyta lógina um vinnuligan fiskiskap, so lógin krevur, at manningar á fiskiskipum undir føroyskum flaggi verða løntar eftir teimum sáttmálum, sum eru galdandi á føroyska arbeiðsmarknaðinum. Sáttmáli við manningarfeløgini skal vera ein treyt fyri at fáa fiskiloyvi.

Javnaðarflokkurin hevði sama uppskot á vári 2012 og á vári 2013. Uppskotini fullu báðar ferðir. Samgongan segðí, at tað er óheppið, at løgtingið ásetir lønir við lóg.