Ein afturat í varðhald

Ein 23 ára gamal maður varð í gjár varðhaldsfongslaður í fýra vikur. Hann er skuldsettur fyri at hava verið við í ráninum í Havn annað páskakvøld. Men hann noktar seg sekan, og hann kærdi avgerðina hjá Føroya rætti til Eystara landsrætt.  

Týskvøldið varð ein 20 ára gamal maður eisini varðhaldsfongslaður í fýra vikur. Hann hevur játtað seg sekan í at hava átt lut í ráninum í túninum hjá BankNordik í Húsagøtu í Havn annað páskakvøld. 

Tveir aðrir menn vórðu tiknir týsdagin. Men eftir grundlógaravhoyringina týskvøldið vórðu teir latnir leysir.

Fjølmiðlar hava fingið forboð móti at endurgeva tað, sum er sagt í báðum grundlógaravhoyringunum um ránið í Havn, tí sambært politinum og Føroya rætti kann tað órógva kanningarnar hjá politinum.

Enn er ikki upplýst, hvussu nógvir pengar blivu tiknir frá kvinnuni, sum seint annað páskakvøld fór úr SMS í BankNordik við pengunum, sum matstovurnar í sølumiðstøðini høvdu selt fyri tann dagin.

Pengarnir vóru í trimum mappum, men bara tann varð stolin.