Atlantsflog ikki børsskrásett longur

P/f Atlantic Airways biður nú um at verða strikað í keypsskálunum í Keypmannahavn og Reykjavík. Tað kunngjørdi felagið í gjár.

Atlantic Airways væntar at spara 1,4 milliónir krónur um árið við at fara av børsunum.

Felagið boðaði eisini frá, at nógv teir flestu privatu partaeigararnir tóku av tilboðnum frá felagnum um at selja tí partabrøvini fyri kurs 210.

Tað almenna og Atlantic Airways eiga nú 95,72 prosent av Atlantsflogi.

Tey, sum ikki gjørdu vart við seg, tá tey fingu tilboðið um at selja, hava nú freist til 16.juni at selja síni partabrøv fyri 210 krónur fyri hvørt partabrævið, sum hevur navnvirðið 100.

Pengarnar fáa tey so 20.juni. Tey hava ikki annað val enn at selja, tí landið og Atlantic Airways eiga meira enn 90 prosent av felagnum.