ES ikki úr svartkjaftsavtaluni

Nú freistin er farin, hevur ES ikki sagt upp avtaluna um svartkjaft, sum strandarlondini gjørdu fyri átta árum síðani.

ES hevur oftari enn eina ferð gjørt vart við, at ES er ikki nøgt við býtið, sum hevur verið galdandi síðani 2006.

Sambært avtaluni, sum kom í gildi í 2006, skulu londini siga frá fyri 1.juli, um tey vilja hava samráðingar um nýggjan býtislykil.

Men Fiskimálaráðið hevur einki frætt frá ES. 

ES vil hava meira 

Føroyar hava formansskapin, tá strandarlondini fara at samráðast um svartkjaft í heyst.

Tá Føroyar og ES tingaðust um føroysku norðhavssildarkvotuna og ES handilsforðingarnar í vár, skal ES hava gjørt vart við, at ES ikki longur góðtekur svartkjaftabýtið, sum kom í 2006. Hesi tíðindi vórðu tó ongantíð váttað alment.  

Sambært avtaluni frá 2006 er ein partur av heildarkvotuni settur av til NEAFC, sum Russland og Grønland so fáa.

Av tí, sum strandarlondini hava at býta millum sín, fáa Føroyar 26,1 prosent, ES 30,5 prosent, Noreg 25,7 prosent og Ísland 17,6 prosent.

Men nú vil ES, sum skilst, hava meira í sín part. 

Og ES heldur, at Ísland fær ov nógv.  

Samráðingarnar um svartkjaftabýtið í 2015 byrja hálvan oktober.