Sjey milliónir afturat til serviðgerð

Løgtingið fer í dag at hava fyrstu viðgerð av eykajáttan til serviðgerð uttanlands.

Játtanin í ár heldur ikki, og tí hevur Jørgen Niclasen, landsstýrismaður, lagt uppskot fyri løgtingið um sjey milliónir krónur í eykajáttan

Heilsumálaráðið sigur, at miðalkostnaðurin fyri serviðgerðina í fjør vísti seg at vera munandi størri enn væntað, og í ár hava verið fleiri sjúklingaferðir enn roknað varð við.

Harafturat sigur Heilsumálaráðið, at umleggingar av roknskapinum hjá Region Hovedstaden hava gjørt tað truplari enn vanligt at meta um støðuna. Nógvar rokningar fyri í fjør - 30 milliónir av tilsamans 103 milliónum - komu ikki Landssjúkrahúsinum í hendur fyrr enn eftir ársenda, sigur Heilsumálaráðið.

Tingfundurin byrjar fyrrapartin klokkan 10.