Rópa aftur varskó: listeria í viðskera úr Danmark

Viðskerin er skorin við somu maskinum sum rullupylsan hjá Jørn A

Á heimasíðuni hjá Heilsufrøðilig Starvsstovuni eru av og á fráboðanir um matvørur, sum eru afturkallaðar. Har sæst neyvt, hvør vøran er, so tann, sum hevur keypt vøruna, kann samanbera tølini á sínari vøru og tølini á hfs.fo

Høgni Djurhuus

22.08.2014 - 07:41

Nú er listeria bakterian aftur sett í samband við viðskera úr kjøti, sum er innfluttur úr Danmark.

Hesa ferð er tó ikki talan um kjøt frá Jørn A Rullepølser, men frá Delika Hammel.

Miklagarður og Delika Hammel hava afturkallað fimm sløg av skornum viðskera.

Maskinur kanska dálkaðar

Orsøkin er tó ikki, at listeria er funnin í sjálvum viðskeranum, men viðskerin er skorin við somu maskinum hjá Delika Hammel, sum skóru rullupylsuna hjá Jørn A, sum er undir illgruna fyri at hava beint fyri 13 fólkum í Danmark.

Miklagarður og Delika Hammel afturkalla hamburgararygg, oksabringu, luksus speigipylsu, royktan filet og oksaspeigipylsu við osti og olivin, sum eru pakkað frá 8. til 19.august og eru í svørtum plastbakkum við Miklagarðslepa.

Heilsufrøðiliga starvsstovan hevur hesar upplýsingar um viðskeran, sum nú er undir illgruna:

Strikukota á pakninginum: 2060000021953. Vøran er seld í Miklagarði. Talan er um átta pakkar.