Oljuprísurin farin niður um 100 dollarar

Oljuprísurin lækkar, og fyrrapartin fór prísuriun á eini tunnu av olju úr Norðsjónum niður um 100 dollarar.

Ikki síðani 3. juni í fjør hevur ein tunna av olju úr Norðsjónum verið so bílig. Í apríl í fjør var oljuprísurin eisini undir 100 dollarar fyri tunnuna í fleiri dagar.

Serfrøðingar vænta kortini ikki so stóra broyting í prísunum, men teir eru ovfarnir av, at prísurin er lækkaður so nógv, tí ófriður er bæði í Ukraina og í Irak. Orsøkin til, at prísurin lækkar, er, at nógv olja er á marknaðinum. Sum frá líður vænta serfrøðingarnir, at ófriðurin í Ukraina og í Irak fer at fáa oljuprísin at hækka aftur.

Ófriðurin í Ukraina og í Irak hevði fyrr í summar við sær, at oljuprísurin hækkaði upp í góðar 115 dollarar fyri tunnuna. Orsøkin til lækkaðu prísirnar seinastu tíðina, er, at minni av olju verður brúkt, samstundis sum londini í OPEC selja meir olju enn vanligt.