Almannaverkið eigur at verja seg móti hóttanum

Arbeiðspláss sum Almannaverkið eigur at hava tilbúgvingarætlan, tí starvsfólkini verða hótt.

Eyðgunn Samuelsen, løgtingskvinna fyri Javnaðarflokkin, fer í dag at spyrja Anniku Olsen, landstýriskvinnu í almannamálum, um

Almannaverkið hevur nakra tilbúgvingarætlan um sálarliga arbeiðsumhvørvið.

Tað hendir meira enn so, at tey á Almannaverkinum kenna seg noydd at ringja til politiið, tí viðskiftafólk hótta tey ella onnur.

Hóttan í síðstu viku

Eyðgunn Samuelsen fer at spyrja millum annað, hvat verður gjørt fyri at fyrireika starvsfólk til tílíkar hendingar sum millum annað ta í síðstu viku.

Hósdagin varð ein maður varðhaldsfongslaður í fýra vikur fyri hóttanir.

Maðurin kom mikudagin við so álvarsligum hóttanum inni á gólvinum hjá Almannaverkinum , at hann varð handtikin. Maðurin hótti tó ikki starvsfólk á Almannaverkinum. Hóttanin var ætlað fólki, sum hann leigar frá.  

Eyðgunn Samuelsen fer eisini at spyrja landsstýriskvinnuna, um nøkur eftirmeting er eftir slíkar hendingar og, um nakað verður gjørt fyri at fyribyrgja endurtøkum.

Tingfundur í dag

Løgtingsfundur verður klokkan 11.00, og tá eru munnligir fyrispurningar á skránni fyri fyrstu ferð í hesari tingsetuni.

Á fundinum fer Fíggjarnevndin at leggja fram álit í tveimum tingmálum, sum nevndin langt síðani eru liðug at viðgera, men eingin tingfundur hevur verið síðani hálvan august.

Annað málið er ein eykajáttan, sjey milliónir krónur, til serviðgerðir uttanlands, og hitt er um, at seyður, sum verður givin sum samsýning fyri fjallgongu og røkt, eigur ikki at vera skattskyldug inntøka hjá tí, sum fær seyðin.