Henrik Old spyr um túratalið hjá Smyrli

<p>Henrik Old, úr Javnaðaflokkinum, spyr Johan Dahl, landsstýrismann, hvørji viðurskifti eru broytt, nú leiðslan fær boð um at skerja túratalið á eini leið, sum, sambært Henriki Old, hevur fægst túratal og mesta flutning.</p>

<p>Í viðmerking til fyrispurningarnar skrivar javnaðartingmaðurin, at 24. oktober 2012 hevði leiðslan á Strandferðsluni fund við tingfólk um játtanina til Strandfersluna har víst varð á, at millum annað av nýggjum&nbsp;manningakrøvum fór játtanin ikki at halda.</p>

<p>Neyðugt var antin at hækka prísin hjá Strandferðsluni ella minka um túratalið hjá Smyrli á farleiðini til Suðuroy.</p>

<p><b>Politiski meirilutin: Eingin broyting í prísi og túratali</b></p>

<p>Strandferðslan fekk tá at vita frá politiska meirilutanum, at tað hvørki bleiv talan um at seta prísin upp ella túratalið niður. Tá var mest talan um siglingina hjá Teistanum.</p>

<p>Nú verður boðað frá, at tað framanundan lága túratalið hjá Smyrli, skal skerjast uppaftur meir. Hesar broytingar vórðu gjørdar, hóast nøgdin av flutningi er vaksin munandi seinastu árini, skrivar Henrik Old í viðmerkingunum til skrivliga fyrispurningin.</p>

<p>Kann tað hugsast, at orsøkin til at man fyri aðru ferð í hesum samgongsskeiðnum velur, at skerja túratalið hjá Smyrli vera tann, at í løtuni situr einki løgtingsumboð fyri Suðuroynna í samgongu? Tí verða hesir spurningar settir til landstýrismannin, Johan Dahl.</p>