Høgni Lisberg í Vangamyndini

<p>Seinastu tíggju árini hevur Høgni Lisberg verið ein av okkara virknastu tónleikarum, og hann hevur nú givið út sína sættu fløgu. Útgávukonsert var í Gøtu í gjárkvøldið, og í kvøld verður Høgni at hoyra í Reinsarínum í Havn saman við tónleikarunum, sum spæla saman við honum á fløguni.</p>

<p>Fleiri sangir hjá Høgna eru vorðnir kendir og eru farnir víða. har teir m.a. hava verið brúktir í telduspølum og í lýsingaátøkum. Høgni megnar at fáa burtur úr orðum og løgum eina mergjaða heild, sum verður undirstrikað við sangheitum sum "Bow Down to no man", "Here we go again" og "Sea of mercy".</p>

<p>Nýggja fløgan hevur heitið "Call for a revolution" og í Vangamyndini sigur Høgni frá, hví so er.</p>

<p>Høgni Lisberg byrjaði ungur at spæla trummur í Clickhaze, og tá bólkurin gavst, fór Høgni víðari við sínum egna tilfari, sum hann hevur givið út og framført hesi seinastu tíggju árini.</p>

<p>Sætta fløgan, ið nú er komin út, er vorðin til á ein heldur øðrvísi hátt enn tær undanfarnu, og Høgni greiðir frá teirri gongdini í Vangamyndini í kvøld eftir Dag og Viku.</p>

<p>Vertur í Vangamyndini er Bogi Godtfred.</p>