Kyndil tapti fyrsta evropeiska dystin

Kyndil byrjaði dystin væl, og vóru á odda tá fyrri hálvleikur var hálvrunnin. 

Men so kom Femina Vise fyri seg, og tók yvirtakið í dystinum. 

Hálvleiksstøðan var 13-8 til Femina Vise úr Belgia.

Fangaðu ikki Femine Vise aftur

Kyndil royndi at hála inn á Femine Vise í seinna hálvleiki, men hetta eydnaðist aldrin. Fýra mál var tað tættasta tær komu til Femina Vise. Hetta var eftir at Kyndil fekk eina røð av brotskastum.

Tomma Petersen hevði ein góðan dag

Málverjin hjá Kyndli, Tomma Petersen spældi ein góðan dyst hóast úrslitið bleiv eitt tap.

Í fyrra hálvleiki tók hon 38% av skotroyndunum frá Femine Vise, og í seinna hálvleiki tók hon ikki minni enn 58% av skotroyndunum.

Hetta eru sera góð tøl, tí her skal man serliga hugsa um at Kyndil ikki kendi mótstøðuliðið áðrenn dystin í dag.

Anna Brimnes var við

Toppskjýttin hjá Kyndli Anna Brimnes, fekk ein skaða í fyrsta dystinum í landskappingini móti VB í ár.

Men hon var aftur í dag eftir skaða, og gjørdist eisini toppskjýtti við seks málum. Ikki bert Anna Brimnes var við aftur eftir skaða í dag.

Jórun Ludvig, sum er royndasti leikarin hjá Kyndli var eisini klár aftur til dystin í dag eftir skurðviðgerð í knænum.

Kunnu prógva seg í morgin

Hetta er sum sagt fyrstu ferð at Kyndil luttekur í EHF cup. Fyrsti dysturin bleiv eitt tap, men í morgin spæla tær enn ein dystin móti soma mótstøðuliði.

Dysturin í morgin er aftur í høllini á hálsi og somuleiðis klokkan 17:00.