Nógv færri arbeiðsóhapp í Føroyum enn í Danmark

Á danska arbeiðsmarknaðin eru 2,7 milliónir fólk. Í Føroyum arbeiða 24.200.

Í miðal 1,58 prosent av donsku løntakarunum vóru fyri arbeiðsóhappi hvørt ár árini 2010, 2011 og 2012.

Í Føroyum er talið 0,48 prosent.

Hetta eru arbeiðsóhapp, sum eru skrásett.

Danska fráboðanarskipanin er talgild burturav. Tí er sannlíkt, at fleiri óhapp verða fráboðað í Danmark.

Men kortini eru lutfalsliga nógv færri arbeiðsóhapp í Føroyum, heldur Arbeiðseftirlitið.

Trý um vikuna 

Til hálvan oktober í ár vórðu skrásett 124 arbeiðsóhapp í Føroyum. Tað svarar til í miðal trý um vikuna.

Í fjør vóru 145 óhapp og 126 í 2012.  

Arbeiðseftirlitið metir, at 25 til 30 óhapp um árið kunnu sigast at vera álvarslig, tað er tá skadda fólkið var í lívsvanda ella fekk varandi mein av óhappinum. 

Í ár er eitt fólk deytt av arbeiðsvanlukku, ein deyðsvanlukka var í fjør og ein í 2012.