15 vilja vera fyristøðufólk í Koltri

15 umsóknir eru komnar til starvið sum fyristøðufólk í Koltri. Tað váttar Andras Mortensen, stjóri fyri Søvnum Landsins. 

Koltur skal skipast sum antikvarisk serskipan undir Søvnum Landsins, og fyristøðufólkið skal millum annað hava umsjón við ognum landsins í Koltri, taka ímóti vitjandi og miðla mentanararvin og náttúruarvin í Koltri.

Starvsstaðurin er í Koltri, og stovnurin veitir bústað.

750.000 kr. settar av

Setanin er treytað av, at játtan verður tøk á fíggjarløgtingslógini fyri 2015, og í fíggjarlógaruppskotinum fyri 2015 eru 750.000 krónur settar av, upplýsir Andras Mortensen, sum ikki vil siga meira um málið.

Starvið verður sett skjótast gjørligt, væntandi í aðru viku, og tann, sum verður settur,tekur við starvinum um ársskiftið.

Starvið verður lønt sambært sáttmála millum Fíggjarmálaráðið og avvarðandi yrkisfelag.