Reiðarar og fiskimenn fara nú at samráðast

Fyrst í næstu viku fara Reiðarafelagið og Fiskimannafelagið og Reiðarafelagið og Maskinmeistarafelagið undir sáttmálasamráðingarnar.

Mánadagin góvu Maskinmeistarafelagið og Reiðarafelagið hvørjum øðrum krøvini til nýggjar sáttmálar, og í gjár býttu Fiskimannafelagið og Reiðarafelagið um krøv.

Skipara- og navigatørfelagið er ikki til reiðar enn við sínum krøvum, men tað verður síðst í januar.

Manningarfeløgini søgdu sáttmálarnar upp. Teir vóru galdandi til nýggjárs.

Yvirmannafeløgini og Reiðarafelagið longdu sáttmálarnar til 1.mars, og Fiskimannafelagið góðtók, at samráðingarnar vórðu útsettar, meðan Reiðarafelagið var bundið av samráðingum við onnur lond um fiskirættindi.