Johan Dahl vil hava frágreiðing frá SEV

Landsstýrismaðurin í vinnumálum, Johan Dahl, biður nú SEV um eina frágreiðing um mongu streymslitini í ár.

Í brævi, sum er sent til stýrisformannin í SEV og til kommunurnar, og sum Kringvarpið hevur fingið innlit í, sigur landsstýrismaðurin, at "útsagnir hjá umboðum fyri SEV í miðlunum bera brá av eini áskoðan um, at vit sum oyggjasamfelag mugu læra okkum at liva við slíkum afturvendandi streymslitum. 

Slíkum áskoðanum taki eg als ikki undir við, og vil ikki góðtaka, um hetta er støðan hjá SEV og eigarunum til hetta álvarsmál," skrivar Johan Dahl.

Landsstýrismaðurin vil eisini hava eina frágreiðing frá SEV, og skrivar:

"Sum landsstýrismaður í orku-og elveitingarmálum skal eg biðja um frágreiðing um mongu streymslitini seinasta mánaðin, og hvat verður gjørt fyri at fyribyrgja hesum framyvir.

Johan Dahl vil eisini hava SEV at senda myndugleikanum á økinum, Jarðfeingi, frágreiðing, um streymslit verður í framtíðini.