Danskt ráð skal eisini virka í Føroyum

<p>Tað ætlar Vinnumálaráðið, sum vil hava løgtingið at broyta lógina um tryggingarvirksemi, so ráðið kann virka á tryggingarøkinum í Føroyum, - tryggingar eru yvirtikið málsøkið.</p>

<p>Sambært Vinnumálaráðnum er Det Systemiske Risikoråd ráðgevandi stovnur, sum skal meta um váðan í danska og føroyska fíggjarheiminum.</p>

<p>Harumframt kann ráðið koma við tilráðingum til myndugleikarnar um átøk, sum ráðið metir kunnu stuðla upp undir fíggjarligt støðufesti. Í ráðnum eru tíggju fólk. Føroyar hava ikki umboð í ráðnum.</p>

<p><strong>Ráðið kann eisini virka á tryggingarøkinum</strong></p>

<p>Í donsku lógini frá 2012 um Det Systemiske Risikoråd stendur, at danski vinnumálaráðharrin kann gera avtalu við landsstýrið um, at ráðið eisini kann virka á tryggingarøkinum í Føroyum.</p>

<p>Danska vinnumálaráðið spurdi longu í 2012, um nýggja ráðið eisini skuldi virka á tryggingarøkinum í Føroyum. Frammanundan hevur løgtingið samtykt, at Det Systemiske Risikoråd eisini fevnir um peningastovnarnar í Føroyum. Tað málsøkið er ikki yvirtikið.</p>