Nýggj gransking: Kálk drepur krabbameinskyknur

<p>Danska Krabbameinsfelagið hevur játtað 1,5 milliónir kr. til eina verkætlan, so fleiri royndir kunnu gerast. Kálk er í beinagrindini og tonnunum, og vit fáa kálk við mjólk.</p>

<p>Nú skulu kanningar vísa, um kálk eisini kann nýtast í viðgerð fyri krabbamein. Kanningar vísa, at verður kálk sprænt í krabbasvull, nýta kyknurnar so nógva orku at koma aftur til javnvágina fyri kálk, at tær doyggja av tí.</p>

<p>Nú skulu fleiri royndir gerast á sjúkrahúsinum í Herlev. Yvirlækni, sum stendur á odda fyri kanningunum, sigur, at higartil er úrslitið gott. Viðgerðin skaðar ikki aðrar kyknur enn krabbameinskyknurnar. Hví so er, er ikki greitt enn, og tí skulu fleiri kanningar til.</p>

<p><strong>Ber ikki til at gera endaliga niðurstøðu enn</strong></p>

<p>- Viðgerðin er bílig og einføld, og hevur ikki stórvegis ávirkan annars, sigur Julie Gehl, yvirlækni á sjúkrahúsinum í Herlev.</p>

<p>Enn ber ikki til at gera nakra endaliga niðurstøðu, og fyribils skal kálk roynast ímóti svullum í húðini. Ikki fyrr enn tær royndirnar eru gjørdar, ber til at fara undir at kanna, um kálkið eisini kann nýtast at viðgera krabbasvull í kroppinum.</p>

<p>Nú verður bíðað í spenningi eftir fleiri úrslitum, tí kann kálk nýtast í viðgerðini fyri krabbamein, verður viðgerðin væl bíligari enn í dag, og kann verða fólki at gagni, sum annars verða viðgjørd fyri krabbamein.</p>