- Tíðindi, mentan og ítróttur
Manningar og reiðarar samráðast um sáttmálar
![](https://kvf.fo/sites/default/files/styles/grein-ovasta-mynd/public/fiskiskip.jpg?itok=B5I1usUY)
Manningarfeløgini og Reiðarafelagið samráðast framvegis um nýggjar sáttmálar, og fundir eru hvønn dag í hesari vikuni.
Samráðingarnar millum Reiðarafelagið og Fiskimannafelagið og Reiðarafelagið og Maskinmeistarafelagið eru komnar longri enn samráðingarnar millum Skipara- og navigatørfelagið og Reiðarafelagið.
Tað var ikki fyrr enn í gjár, at Skipara- og navigatørfelagið og Reiðarafelagið viðmerktu krøvini hvørt hjá øðrum. Og feløgini hittast aftur hósdagin.
Manningarfeløgini søgdu sáttmálarnar upp. Teir vóru galdandi til nýggjárs.
Yvirmannafeløgini og Reiðarafelagið longdu sáttmálarnar til 1.mars, og Fiskimannafelagið góðtók, at samráðingarnar vórðu útsettar, meðan Reiðarafelagið var bundið av samráðingum við onnur lond um fiskirættindi.