Norðmenn til Hollands í fongsul

Pláss er ikki í norsku fongslunum, og tí skulu dømdir norðmenn nú til Hollands at sita dómin.

Norsku myndugleikarnir hava gjørt eina avtalu við myndugleikarnar í Hollandi um, at 242 norðmenn skulu sita dómin í Hollandi, og tað skal Noreg rinda 190 milliónir kr. fyri um árið, skrivar Verdes Gang.

Norski løgmálaráðharrin sigur, at ætlanin er fyribils, tí Noreg arbeiðir við at fáa fleiri fongsulspláss til vega.

Ein uppgerð í heyst vísti, at 1300 fólk sum eru dømd í Noregi, sleppa ikki inn at sita, tí pláss er ikki fyri teimum.

Sita eftir summarfrítíðina

Fyrstu norðmenninir verða sendir til Hollands eftir summarfrítíðina, og útlendingar, sum eru dømdir í Noregi, skulu eisini til Hollands at sita dómin, stendur í avtaluni.

Norski umboðsmaðurin ávarar ímóti avtaluni við Holland, tí so nógvir ógreiðir spurningar eru.

M.a. vísir hann á, at tað er ikki greitt, hvussu viðurskiftini hjá fongslaðu norðmonnunum skulu skipast. Um tað hendir seg, at ein av dømdu norðmonnunum fremur brotsverk, meðan hann situr í Hollandi, er hollendsk lóg galdandi, og ikki norsk lóg, vísir norski umboðsmaðurin á.

Norsku fongsulsvørðarnir eru heldur ikki nøgdir við avtaluna. Teir vísa á, at skipanin er ikki tann sama í fongslunum, og tað verður ikki so lætt hjá familju at hitta tey, sum sita í Hollandi.

Fólk í Hollandi, sum sita í sama fongsli, sum norðmenninir skulu sita í, eru heldur ikki álvulig við støðuna, tí tey vænta, at teirra umstøður gerast verri, um nógvir norðmenn skulu sita í sama fongsli.