Kemikalii í leikum til pinkubørn

Nýggj kanning hjá danska brúkararáðnum Tænk vísir, at í fimtuhvørjari vøru til pinku- og smábørn eru evni, sum eru undir illgruna fyri at órógva hormon-javnvágina ella at elva til krabbamein.

Ótrygg foreldur

- Tað er ræðandi, at vit hava kannað so nógvar ymiskar vørur til pinkubørn, og at vit ikki hava funnið ein einasta vørubólk, har foreldur kunnu vera vís í, at hormonórógvandi evni ikki eru í, sigur Anja Philip, forkvinna í Tænk, við dagblaðið við Informatión. - Nógvar vísindaligar kanningar eru gjørdar, sum benda á, at hesi evnini órógva hormonjavnvágina, og tí eiga tey ikki at vera í nýtsluvørum - og als ikki í vørum til pinkubørn, sigur hon.

Pinkubørn eru serliga viðkvom, tí tey mangan súgva og tyggja leikur og annað, og harvið koma skaðiligu evnini lættari í kroppin. 

Brúkararáðið í Danmark mælir tí nýggja umhvørvismálaráðharranum til at seta bann fyri evnunum.