Endaspurturin er í gongd í Danmark

Sigmar Bláberg fekk fyri løtu síðan orðið á Kaj Joensen, ið fylgir valinum á Christiansborg.

Við millum lítlum og ongum muni á reyða og bláa blokki, er sum vera man spennandi, og danskir flokkar og politikarar royna av øllum alvi at ávirka tey mongu, ið enn ikki hava gjørt av, hvar krossurin skal setast.

Kaj Joensen tosaði við nakrar danskar veljarar, og hesir siga seg einki hava ímóti, at føroyingar og grønlendingar kunnu koma til at avgera hvør skal stjórna Danmark komandi árini, tí vit eru øll partar av ríkisfelagsskapinum við sama fólkaræði.

Ongar exit-poll kanningar verða almannakunngjørdar í Danmark áðrenn valstøðini lata aftur, tí so nógv kann ávirkast av tílikum forsøgnum.