Minni nøgd, men meira fæst fyri fiskin

Góð 2.000 tons minni vórðu fiskað undir Føroyum fyrstu fimm mánaðirnar í ár, samanborið við somu tíð í fjør. Tá er talan um øll fiskasløg.  

Men munandi meir fekst fyri fiskin, tí sølan gav 55 milliónir kr. meir enn í fjør.

Uppgerðin yvir vanligu botnfiskasløgini vísir, at nakað meir av toski varð fiskað, 1700 tons, sum er ein triðing meir enn í fjør. Prísurin var góður, tí virðið vaks við næstan 53 milliónum kr.

Fiskiskapurin eftir hýsu var tann sami, men prísurin var heldur betri.

Upsin royndist illa fyrstu fimm mánaðirnar. Fiskað vórðu 2.500 tons færri, og tað vóru 20 prosent minni enn somu tíð í fjør. Tað sást eisini aftur í søluni, sum var næstan 10 milliónir minni enn í fjør.

Fiskað vóru 21.000 tons av vanligu botnfiskasløgunum fyrstu fimm mánaðirnar í ár, samanborið við sløk 23.000 tons í fjør.