Krevur at grindalógin verður sett úr gildi

Fiskimálaráðið skal viðurkenna, at grindalógin er ógildug, krevur Henrik Weihe Joensen, ráðgevi í trygdar- og verju og tilbúgvingarmálum, ið hevur stevnt Fiskimálaráðnum.

Løgtingið hevur ikki lóggávuvald at seta í gildi nýggjar reglur í løgtingslóg um virksemi hjá politinum, sum snúgva seg um inntriv mótvegis persónum og lutum, skrivar hann í tíðindaskrivi til miðlarnar í dag.

Løgtingið hevur sambært heimastýrislógini lóggávuvaldið í yvirtiknum málum. Politiið er felagsmál og tí er tað Fólkatingið, sum hevur lóggávuvaldið viðvíkjandi politinum.

Brot á yvirskipaðar lógir

Uppáhaldið um, at grindalógin er ógildug kemst av, at grein 10 og 11 í grindalógini eru tiknar beinleiðis úr donsku politilógini, sum ikki er galdandi í Føroyum.

Hetta er brot á yvirskipaðu lógirnar, sum Løgtingið byggir lóggávuvaldið á sigur Henrik Weihe Joensen.

Hann metir hetta at vera prinsipielt mál, sum snýr seg um grundleggjandi viðurskifti, sum hava við fólkaræði og rættartrygdina hjá borgarum í Føroyum at gera.