Gjógvin lýst upp í samkenslulitum

Fleiri kend staðarmerki hava um vikuskiftið borið fronsku litirnar í samkenslu. Eisini í Føroyum hevur samkensla verið lýst

Soleiðis hevur gjógvin við Gjógv sæð út um vikuskiftið, ið hevur verið prýdd við litunum í franska flagginum

Mynd: Skíggjamynd: Jóannis Sørensen/VisitFaroeIslands á Facebook

Bjarni Mohr

16.11.2015 - 08:30

Kend staðarmerki úti í heimi hava síðani fríggjakvøldið borið fronsku litirnar, blátt, hvítt og reytt, í samkenslu eftir yvirgangsálopini fríggjakvøldið, tá 129 fólk lótu lív.

Eisini í Føroyum er samkensla víst alment. Leygarkvøldið uttanfyri Løgtingið, og um vikuskiftið í gjónni við Gjógv, ið hevur verið prýdd við fronsku litunum.

Ein mynd, ið Jóannis Sørensen hevur tikið, og sum VisitFaroeIslands hevur deilt á Facebook, er longu farin víða um á sosiala miðlinum.

2174 fólk hava vent tumlinum upp fyri myndini eftir 11 tímum, og myndin er somuleiðis eisini deild meira enn 300 ferðirnar á Facebook.