Betri fiskaprísir í 2015 enn 2014

Hagtøl hjá Fiskimannafelagnum siga, at smáir trolarar og línuskip fingu 13 prosent meira fyri fiskin í fjør, og stóru trolararnir fingu 21 prosent meira enn í 2014.

Fiskimannafelagið hevur yvrilit yvir fiskaprísirnar heilt aftur til 1995 í ársfrágreiðingini fyri 2015. Sambært teimum, so hava trolararnir ikki fingið betri prís enn í fjør hesi 21 árini. Men tað hava línuskipini.

Nógv tann besti prísurin, sum línuskip hava fingið síðani 1995, var í 2007. Tá var miðalprísurin fyri kilo 16,44 kr. Í fjør var hann 14,07 kr. Trý onnur ár fingu línuskipini eisini meira fyri fiskin enn í fjør.