Neyðugt við einari leiðslu í heilsuverkinum

- Tað er óheppið at raðfesta okkara sjúkrahúsverk eftir politiska landslagnum í staðin fyri at taka atlit at heilsu og trygd.

Tað sigur Ruth Vang, forkvinna í fíggjarnevndini, nú Bjarni Hammer og Kristin Michelsen, samgongutingmenn, krevja meiri pening til Suðuroyar Sjúkrahús.

- Hetta er aftur ein grundgeving fyri, at vit skulu hava eina leiðslu fyri alt sjúkrahúsverkið, sum ger fakligar metingar, sigur hon.

Ruth Vang sigur, at hon bíðar eftir tilmælinum frá arbeiðsbólkinum, sum er settur at gera tilmæli um, hvørjar funksjónir skulu vera á hvørjum sjúkrahúsi, og hon mælir til, at Bjarni Hammer og Kristin Michelsen eisini bíða eftir hesum tilmælinum, sum kemur tíðliga í summar.

Ruth Vang var gestur í Degi og Viku í kvøld.