Sukursjúka økir um vandan fyri krabbameini

Fólk, ið hava typu 1-diabetes, eru í størri vanda fyri at fáa krabbamein í livrina, lívmóðrina, nýrini og brisið enn fólk, ið ikki hava typu 1-diabetes.

Tað er niðurstøðan í nýggjari, altjóða granskingarverkætlan, skrivar jp.dk. 9.149 fólk í Danmark, Svøríki, Finnlandi Skotlandi og Avstralia vórðu kannað.

Hinvegin eru fólk, ið hava typu 1-diabetes, í minni vanda fyri at fáa krabbamein í bløðruhálskertilin - prostata - og bróstini, staðfestir granskingarverkætlanin.

Óvist hvør orsøkin er

Granskararnir kunnu ikki vísa á nakra serstaka grund til, at samband er millum nøkur ávís sløg av krabbameini og typu 1-diabetes.

Eitt er tó heilt greitt sambært granskarúrslitinum: Fólk, ið taka insulin fyri sukursjúku, eru ikki í størri vanda fyri at fáa krabbamein.

- Var samband var millum insulin og krabbamein, skuldi vandin verið størri við aldrinum, og tað er hann ikki, sigur Bendix Carstensen, granskari, sambært JP.