Sjóvinnuhúsið kanska leigast út í 30 ár

Sjóvinnuhúsið á Vestaru bryggju í Havn verður gistingarhús, og salsiloin verður matstova. Tórshavnar býráð skal nú taka støðu til ein sáttmála við Smyri Line um at leiga Sjóvinnuhúsið í 30 ár.

Havnarmeistarin mælir býráðnum til at taka undir við leigusáttmálanum. Málið skuldi koma fyri á býráðsfundi í gjárkvøldið, men sambært gerðabókini varð tað tikið av skrá.

Skulu rinda fyri umbygging

Sambært uppskotinum um leigusáttmálan, sum also skal verða galdandi í 30 ár, skal Smyril Line rinda fyri at umbyggja Sjóvinnuhúsið til gistingarhús.

Í Sjóvinnuhúsinum vera 91 dupultkømur og fleiri smærri fundarhøli. Í saltsiloini verður matstova á niðastu hædd til 350 fólk, og á aðru hædd verður ein minni matstova.

Á fjórðu hædd verða hølir til fyrilestar og annað til umleið 300 fólk. Sambært uppskotinum um leigusáttmálan skal Smyril Line rinda 3,3 milliónir krónur í leigu um árið.

SÍ EISINI Bacalao skal vera frítíðardepil

Fyrstu tvey árini verður leiguupphæddin tó 1,7 milliónir kr. um árið. 29. og 30. árið verður leigan slakar tvær milliónir um árið.

Heldur leigusáttmálin fram, eftir at tey 30 árini eru farin, verður leigugjaldið aftur 3,3 milliónir um árið, stendur í uppskotinum um leigusáttmálan við Smyril Line um Sjóvinnuhúsið.