Rok um menningarætlanina

Í gjár segði stjórin á Klaksvíkar sjúkrahúsi, Heri Ellingsgaard, at hann varð stórliga bilsin, tá menningarætlanin fyri føroyska sjúkrahúsverkið varð løgd fram fyrrapartin týsdagin.

Ætlanin, sum varð løgd fram á tíðindafundinum í Heilsumálaráðnum, er broytt nógv samanborið við tað, hon var fyri samanskrivingina.

Heri Ellingsgaard er í stóra serfrøðingabólkinum, sum var við til at gera menningarætlanina. Eisini politikarar í Norðoyggjum eru misnøgdir og eru farnir at gera vart við seg.

Smeitur fyri Norðoyggjar

Bjørn Kalsø, løgtingsmaður, skrivar, at verður tilmælið fylgt óbroytt, verður tað ein dyggur smeitur fyri Klaksvíkar Sjúkrahús og Norðoyggjar.

Tí, sum hann skrivar, leiðslan á Klaksvíkar sjúkrahúsi skal flytast til Havnar á Landssjúkrahúsið, har ein felags leiðsla skal skipast fyri øll trý sjúkrahúsini. Og ongar akuttar viðgerðir av týdningi skulu gerast í Klaksvík.

Klaksvíkar sjúkrahús verður tá ikki at rokna sum sjúkrahús longur, skrivar Bjørn Kalsø. Eitt sjúkrahús uttan leiðslu á staðnum og uttan akuttar viðgerðir er ikki sjúkrahús, skrivar Bjørn Kalsø, løgtingsmaður.