Vakmyndatól skulu ansa jólabýnum

Endamálið við vakmyndatólunum er, at tey skulu vera fyribyrgjandi, soleiðis at fólk ikki gera seg inn á jólatrø og jólabýir hjá kommununi. 

Fleiri dømi hava fyrr verið um herverk á jólatrø, ið eru brotin, og ljósketur stolnar.

Bíða eftir loyvinum

Talan er um eina sjálvvirkandi skipan. Hendir nakað revsivert, hevur løgreglan heimild at síggja upptøkurnar á staðnum og uppklára lógarbrot.

Kommunan hevur biðið Dátueftirlitið um góðkenning, og øll neyðug fyrilit eru tikin til tess at tryggja privatlívið hjá borgarnum.

Tólini verða sett til, tá loyvið fyriliggur, sigur Tórshavnar kommuna á heimasíðuni.