Mugu eisini flúgva um veturin

Men danskir mynduleikar hava ta fatan, at summar av treytunum, ið landsstýrið leggur upp til, ikki kunnu setast eftir lóggávuni á loftferðsluøkinum.

Tað kemur fram í svari frá Poul Michelsen, landsstýrismanni, til Bjørn Kalsø, løgtingsmann. Atlantic Airways má metast at hava skyldu til at flúgva allar dagar alt árið, eisini vetrarhálvuna, tá ferðafólkatalið er minni.

SÍ EISINI Stórur áhugi fyri nýggjari flúgving

Hetta er ein skylda, sum kann leggja fíggjarligar byrðar á felagið, serliga nú eitt annað flogfelag kemur inn á somu rutu, stendur í svarinum.

Fyri at tað ikki skal vera ójøvn kapping, hevur landsstýrið ta fatan, at somu treytir eiga at verða settar SAS, sum verða settar Atlantic Airways, tað vil siga, at tað verður flogið alt árið, eisini vetrarhálvuna, sigur Poul Michelsen í svarinum.

Samstarvsavtala kann halda fram

Landsstýrið hevur eisini sagt, at møguleiki framhaldandi verður at varðveita higartil galdandi samstarvsavtalur millum SAS og Atlantic Airways, sum eru føroyska brúkaranum til gagns.

Umframt omanfyrinevndu ynski hevur landsstýrið eisini víst á týdningin av, at danskir myndugleikar virka fyri, at ferð verður sett á málið um føroyskan limaskap í FELO-samstarvinum.

Tað er Trafik-, Bygge- og Boligstyrelsen í Danmark, sum gevur loyvi at flúgva millum Føroyar og útlandið. Danskir og føroyskir myndugleikar samskifta í løtuni um umsóknirnar frá SAS og Loganair.

Ikki fingið endaligt loyvi

Danskir myndugleikar hava ta fatan, at onkrar av treytunum, ið landsstýrið leggur upp til, ikki kunnu setast eftir lóggávuni á loftferðsluøkinum.

Í flestu førum er tá talan um treytir, ið eiga at verða viðgjørdar sambært kappingarreglum og av kappingarmyndugleikunum í londunum báðum.

Enn eru loyvi tó ikki latin útlendsku feløgunum at fara undir flúgving til Føroyar, og treytirnar eru tí heldur ikki settar enn, kemur fram í svarinum.