Rúni fekk mentanarvirðislønina

Rúni Brattaberg, operasangari, fekk mentanarvirðisløn landsins fyri 2016. Virðislønin er 150.000 kr., og varð latin Rúna Brattaberg fyri hansara avrik sum viðurkendur operasangari í stórum operahúsum um allan heim. 

Tvær aðrar virðislønir vórðu eisini latnar á Seglloftinum á Tvøroyri í gjárkvøldið. 

Steinprent, grafiski verkstaðurin í Havn, fekk heiðursgávu landsins, 75.000 kr., fyri sítt stóra íkast til til føroyskt mentanar og listalív í Føroyum seinastu 18 árini.

 Anna Malan Jógvansdóttir, yrkjari og myndlistakvinna, fekk virðislønina til ungt listafólk, 50.000 kr. Hon gav út sítt fyrsta listprýdda yrkingasavn í 2015 og gongur í løtuni á rithøvundaskúlanum í Keypmannahavn.

Tað var Rigmor Dam, landsstýriskvinna, sum vegna Mentamálaráðið, handaði virðislønirnar.