Petur Mittún aðalskrivari í ÍSF

Starvsnevndin í Ítróttasambandi Føroya hevur sett Petur Mittún sum aðalskrivara í ÍSF. Tað skrivar ÍSF í tíðindaskrivi.

Petur Mittún er 44 ára gamal og føddur og uppvaksin í Havn. Hann hevur íðkað ítrótt á høgum støði, eins og hann hevur virkað sum venjari, og seinastu tíðina hevur hann eisini virkað sum hondbóltsmennari hjá Hondbóltsambandi Føroya.

Petur Mittún hevur áður starvast sum leiðari bæði innan tað privata og tað almenna, eins og hann hevur verið leiðari innan ítrótt.

Starvið sum aðalskrivari í Ítróttasambandi Føroya er nýtt og er týðandi partur av ætlanini um at umskipa og menna leiðslubygnaðin í ÍSF.

Aðalskrivarin fer at hava dagligu leiðsluna av ÍSF og standa á odda fyri dagligu umsitingini. Í sambandi við starvssetanina verður móttøka í ÍSF-húsinum mikudagin 1. mars kl. 15:00.