Yvirfriðingarnevndin nýggja niðurstøðu

Kaldbaksfólk hava frá byrjan mótmælt ætlanini um, at grót úr Eysturoyartunlinum skal leggjast við Sund og brúkast til útbygging av ídnaðarøkinum har.

Í fyrstu atløgu fingu tey ikki viðhald í Yvirfriðingarnevndini, men kaldbaksfólk hava víst á náttúrufriðingarlógina, sum sigur, at øki kunnu friðast, tá tey bera av í vakurleika, liggja væl fyri ella hava sereyðkenni í landslagnum, í plantugróðri ella djóralívi.

Øki kunnu eisini friðast, sum hava munandi týdning fyri fólk, millum annað støð, har frítt útsýni er.

Yvirfriðingarnevndin metir hetta vera nýggjar upplýsingar í málinum, og á fundi í gjár samtykti nevndin at spyrja Tórshavnar kommunu, hvat hon heldur um tað at friða nakrar hundrað metrar á Sundi.

Kommunan fær 14 dagar at svara.