Kanna alzheimer í Føroyum

Alzheimerfelagið stendur fyri verkætlanini saman við Mariu Skaalum Petersen, sum granskar í demens í Føroyum. 

Sofus Joensen, sálarsjúkulækni á Demensklinikkini, er fakligur ráðgevi, og Anna Rubeksen, sjúkrarøktarfrøðingur, sum hevur royndir á demensøkinum, er sett í starv í sambandi við kanningina.

Verkætlanin hevur fingið stuðul úr Sjúkrakassagrunninum.

Hagtølini neyðug

Alzheimerfelagið heldur tað vera grundleggjandi at fáa hagtøl til vega, hvussu mong eru rakt av demens í Føroyum.

Hetta er neyðugt, til tess at myndugleikar og stovnar hava vitan og kunnu raðfesta sambært átøkunum í Demensætlanini, sigur Alzheimerfelagið. 

Í næstum fáa øll, sum búgva á eldrabýlum, eitt kunningarskriv og áheitan um at vera við í kanningini. Síðani fer sjúkrarøktarfrøðingurin á heimið at spyrja hvønn einstakan, um tey vilja vera við. 

Ikki kannast umaftur

Tey, sum longu hava eina demens-diagnosu, verða ikki kannað. Gevur kanningin ábendingar um demens, verður boðað frá tí

So kunnu tey, sum eru kannað, fara til kommunulækna at fáa ávísing til Demensklinikkina á Landssjúkrahúsinum. 

Dátueftirlitið hevur givið loyvi til kanningina, og eingin óviðkomandi sleppur fram at upplýsingunum, sum eru í trúnaði, sigur Alzheimerfelagið.