Fólkatalið nærkast 50.000

Nú búgva 49.884 fólk í Føroyum. Fólkatalið vaks við 740 fólkum í fjør, og so stórur fólkavøkstur hevur ikki verið í einum ári síðani 2001.

Tað vísa tøl frá Hagstovuni, sum eisini geva ábendingar um, at fólkatalið í landinum skjótt fer at seta met, heldur verandi gongdin fram.

Verður gongdin næstu vikurnar, sum hon hevur verið, verður fólkatalið í Føroyum 50.000 - kanska longu í mars.

Burðaravlopið stórt

Nettotilflytingin, sum er munurin millum tilflyting og fráflyting, var 439. Burðaravlopið, sum er munurin millum fødd og deyð, var 301 fólk.

Nettotilflytingin í Føroyum hevur ikki verið so stór síðani 2001, og burðaravlopið hevur ikki verið størri síðani 2004.

Ikki síðani 1980 hevur verið so lítil fráflyting, sum í fjør. 1173 fólk fluttu av landinum í fjør, vísa nýggjastu tølini hjá Hagstovu Føroya.