Nærkast søguligum fólkatali

Tað ber ikki til at siga í dag. Men um nakrar vikur heldur Hagstovan seg kunna boða frá, at fólkatalið í Føroyum fyri fyrstu ferð er farið upp um 50.000.

Tann 1. februar vóru 49.935 fólk í Føroyum. Hóast tað var fyri hálvum øðrum mánaði síðani, ber ikki til at siga nú, at 65 fólk eru komin afturat netto síðani 1. februar.

Kann ganga ein tíð

Hagstovan sigur, at fólkatalið verður funnið við at telja tey, sum eru skrásett at búgva í Føroyum. Tey eru skrásett í Landsfólkaskránni, sum fær sínar upplýsingar frá kommununum.

Tað gongur ein tíð, áðrenn allar skrásetingarnar eru komnar til kommunurnar og fráboðaðar Landsfólkaskránni.

Fødd og deyð eru oftast skrásett ein til tveir mánaðir eftir hendingina. Tað sama er at siga um fólk, sum flyta til Føroya og úr Føroyum.

Fleiri kunnu gerast nummar 50.000

Í onkrum føri koma upplýsingar um flyting ikki fyrr enn fleiri mánaðir ella ár seinni. Hetta ger, at fólkatalið ikki er heilt eftirfarandi fyrr enn ein tíð er fráliðin.

Tað merkir eisini, sigur Hagstovan, at fleiri føroyingar kunna gerast føroyingur nummar 50.000. Tað veldst um, nær verður hugt eftir skrásetingunum.

Nú vit eru komin inn í hálvan mars, nærkast dagurin, tá vit kunnu siga, at vit eru 50.000 fólk í Føroyum, men enn ganga nakrar vikur afturat, sigur Hagstovan.