Lógirnar ikki broyttar fyribils

Løgtingið hevur samtykt at yvirtaka millum annað foreldramyndugleikan og samveru millum foreldur og børn, hjúnaband og hjúnaskilnað, ættleiðing og arv.

Samanumtikið er talan um lógirnar um familjur og rætt teirra. Lógirnar eru danskar, og Ríkisumboðið umsitur tær í Føroyum.

Kostar 10 milliónir um árið

Hóast yvirtøkan er samtykt í Løgtinginum, verða allar lógirnar ikki føroyskar eftir einum degi. Donsku lógirnar verða framvegis galdandi, til føroyskar lógir so við og við avloysa tær.

Sirið Stenberg, landsstýriskvinna í heilsu- og innlendisalum, sigur, at hon ætlar fyrst at gera lógina um foreldramyndugleika og samveru.

Føroyar skulu yvirtaka 15 lógir og 12 millumtjóða sáttmálar og avtalur. Yvirtøkan er mett at kosta 10,3 milliónir krónur um árið.