Seks eru deyð í eldsbrunanum í London

Í minsta lagi seks fólk eru deyð og umleið 70 fólk eru flutt á sjúkrahús eftir eldsbrunan í Grenfell Tower í vestara parti av London í nátt og í morgun.

Nógv fólk eru bjargað, men leitað verður eisini eftir fólki, og Sadiq Khan, borgarstjóri í London, sigur seg óttast fyri, at fleiri verða funnin, tá eldurin er sløktur.

Bygningurin kann rapa

200 sløkkiliðsmenn eru á staðnum. Eldur er framvegis í stóra íbúðarhúsinum og vandi er fyri, at hann fer at rapa.

Eldurin varð fráboðaður stutt aftaná midnátt í gjárkvøldið. Fólk á staðnum siga frá, at tey hoyrdu neyðarróp, sóu ræðslusligin fólk við vindeyguni, og at summi teirra lupu út undan eldinum.

Í háhúsinum eru 120 íbúðir og har búgva nærum 600 fólk. Blokkurin var bygdur í 1974 og er nýliga umvældur, men bæði undan umvælingini og aftaná hava fólk, ið búgva har, gjørt vart við, at brunatrygdin var ikki í lagi.