Sløkkiliðsleiðari: Eftirlitið ikki nøktandi

Tað sigur Kartni Jacobsen, sløkkiliðsstjóri í Tórshavnar kommunu. Óvissa hevur valdað á økinum síðani brunalógin fór úr gildi í 2012, men Tórshavnar sløkkilið hevur fleiri ferðir víst á, at tað kann gera brunaeftirlitini í Tórshavnar kommunu.

Gamla brunalógin fór úr gildi í 2012, og síðani hevur óvissa valdað um hvørt tað er landið ella kommunurnar, sum hava ábyrgdina av regluliga at brunasýna bygningar.

Reglur um regluligt eftirlit broyttar

Í gomlu brunalógini varð álagt Brunaumsjón landsins regluliga at sýna bygningar har fólk koma, millum annað samkomuhús, gistingarhús, sjúkrahús og skúlar.

Men í teimum báðum lógunum, sum komu í staðin, er hetta ikki helt greitt. Kommunurnar skulu hava eftirlit við bygningum í kommununi, men ikki at tær skulu hava regluligt eftirlit, stendur í byggilógini.

Arbeiðs- og bruneftirlitið skal bara sýna bygningar, har spreingikvæm og eldfim evni eru, meðan stovnurin av sínum eintingum kan sýna aðrar bygningar, stendur í tilbúgvingarlógini, sum Arbeiðs- og brunaeftirlitið nú umsitur.

Skúlar ikki kannaðir í trý ár

Í fjør skivaði Tórshavnar kommuna til Henrik Old, landsstýrismann í tilbúgvingarmálum,  at Tórhavnar kommuna í trý ár ikki hevði kannað skúlar, hotell, samkomhús og aðrar bygningar, har nógv fólk koma. Millum annað hevði einki eftirlit verið við landssjúkrahúsinum í trý ár.

Tórhavnar kommmu spurdi landsstýrið um, hvør eigur at sýna bygningar, sum eru í nýtslu. Í svarinum frá landsstýrinum gjørdist greitt, at kommunur eiga ábyrgdina av bygningum, sum kommunan varðar av - herundir skúlar, hotell og samkomur.

Men enn er stórt ivamál - serliga um stórar bygningar hjá landinum. Eitt nú Landssjúkrahúsið og Vága floghavn. Men landsstýrismaðurin kann áseta, at tað eru kommunurnar sum skulu gera eftirlitini, sigur Kartni Jacobsen.