Grindin var stór - drápið var skjótt

Grindin, sum varð hildin til í Sandagerði í gjár var 164 hval og hon varð býtt í 1707 drápspartar. Seðlarnir komu út kl. 23, og stutt eftir var liðugt at skera upp.

Grindin var fyrst sædd eystanfyri Nólsoynna seinnapartin í gjár, og tað gekk skjótt og væl at reka. Drápið tók bara 15 minuttir hóast grindin var hampuliga stór, sigur Finnbogi Midjord sýslumaður.

Ein lítil ósemja stakk seg upp, meðan grindin varð rikin, váttar Hanus Højgaard, grindaformaður.

Spurningurin var um grindin skuldi rekast á Sandagerð, ella inn á Skálabotn, sum nýliga er fyribils góðkend sum hvalvág.

Men grindin var nærri Sandagerði, og sjóvarfallið talaði eisini ímóti, at hon skuldi inn á Skálabotn. Tí varð gjørt av, at reka hana á Sandagerð, sigur Hanus Højgaard, grindaformaður.