Gullið á heimavegi

Vit skrúva tíðina aftur til 1989. Jógvan Sundstein, løgmaður bjóðar vælkomin á oyggjaleikir, sum Føroyar á fyrsta - og higartil einasta - sinni eru vertir fyri.

Absalon Hansen hevur vant hvønn dag síðan leikirnar í '87, tí hann ætlar sær at vinna gull á marathonteininum av Selatrað til Toftir.

Tað eydnast honum, og hann minnist enn í dag, hvussu fólk stóðu frammi við vegnum og klappaðu fyri honum.

Nøkur ár seinni skifti Absalon renniskógvarnar út við súkklu, og seinni er hon skift út við boga og ørv. Komandi dagarnar fara Absalon og hinir bogaskjúttarnir at gera sítt besta fyri Føroyar í Gotlandi.