Fyribilsleiðslan heldur fram

Orsøkin er, at sjúkrameldingin hjá leiðaranum er longd til í august. Tað váttar Poul Gert Hansen, aðalstjóri í Mentamálaráðnum, fyri útvarpinum.

Tað hevur ikki borið til at fáa orðið á Rigmor Dam, landsstýriskvinnu, og heldur ikki á fyribilsleiðaran á Sernámi, Magnus Tausen. Fyrst í mai segði landsstýriskvinnan, at tað ikki bar til, at Sernám lá í leiðsluloysi. 

SÍ EISINI Órógv á sernámi

Støðan gjørdist serlig á Sernámi í vár, tí fyrst fór varaleiðarin, Harriet Hansen, í farloyvi, og síðani var leiðarin, Emmy Joensen, sjúkrameldað.

Tí mátti Mentamálaráðið í skundi fáa trý fólk úr ráðnum at standa á odda fyri Sernámi. Magnus Tausen var settur sum leiðari, Frida Poulsen, sum fakligur leiðari og Anna Kass sum fíggjarleiðari.

Nú hava tey so fingið boð um at fara undir at fyrireika næsta skúlaár, og tey verða á stovninum til einaferð í august, sum Poul Gert Hansen, aðalstjóri málber seg við útvarpið.