Skulu varðveita ríkisborgararættin

Føroyingar, sum flyta í annað land, kunnu varðveita sín danska ríkisborgararætt, um tey fáa ríkisborgararætt í landinum, sum tey flyta til. Høgni Hoydal, varaløgmaður, hevur svarað fyri løgmann, sum fekk spurningar um dupultan ríkisbogararætt.

Í svarinum til Sonju Jógvansdóttur, løgtingskvinnu, stendur, at løgmaður hevur biðið danskar myndugleikar um at senda lógaruppskot til Føroya um, at tað eisini verður gjørligt hjá teimum, sum búgva í Føroyum, at hava dupultan ríkisborgararætt.

Hetta hevur borið til í Danmark síðani 2015. Treytin fyri at fáa dupultan ríkisborgararætt er, at landið, har fólk higartil hava verið ríkisborgarar, ella landið, har sum fólk vilja gerast ríkisborgarar, loyvir dupultum ríkisborgararætti.

Fleiri fyrimunir enn vansar

Tað er tí ikki donsk lóg einsamøll, sum avger spurningin um dupultan ríkisborgararætt. Í svarinum frá løgmanni stendur, at vansin við dupultum ríkisborgarrætti er, at loyaliteturin móti Føroyum minkar.

Men fyrimunirnir eru sambært svarinum fleiri enn vansarnir. Danska lógin, sum kom í gildi 1.september 2015, kann setast í gildi í Føroyum við kongligari fyriskipan, um Løgtingið vil tað. 

Sambært manntalinum, sum var í 2011, vóru tá 1439 fólk í Føroyum, sum høvdu annað móðurmál enn føroyskt ella danskt.