Høvdu ongar mannagongdir

Tað kemur fram í niðurstøðuni í kanningini hjá Bárði Larsen, løgfrøðingi, um skattamálið hjá Eik. Tað eru bara niðurstøðurnar og ikki øll kanningin hjá Bárði Larsen, ið er almannakunngjørd.

Men ein av niðurstøðunum er, at TAKS ikki hevði mannagongdir fyri, hvussu stór og trupul mál skulu handfarast. Í niðurstøðuni sigur Bárður Larsen:

"Eisini hevur hetta málið víst, at tað innanhýsis á stovninum TAKS ikki í nøktandi mun hevur hevur verið ein fatan av, hvussu farast skal fram í truplum málum."

SÍ EISINI Skattamálið: Niðurstøðurnar hjá løgfrøðinginum

"Vantandi felags fatan tykist vera um, hvussu langt upp í hierarkiið stór og/ella trupul mál eiga at fara, eins og tað vantar ein fatan av, at prinsipiel støða má takast til, hvørjir málsviðgerðar verða settir at viðgera málini, og um hjálp skal keypast til málsviðgerðina uttanhýsis osfr."

"Væntast kann ikki, at stjórin er langt inni í málsviðgerðini í slíkum málum, men stjórin eigur kortini at vera við í prinsipiellu støðutakanini til, hvussu serliga stór og prinsipiel mál skulu handfarast."

Sum sagt, so eru tað bara niðurstøður av frágreiðingini, ið eru almannakunngjørdar. Fíggjarmálaráðið skrivar, at "Frágreiðingin kundi verið almannakunngjørd, um Betri banki tók undir við hesum." Víðari stendur:

"Men Betri banki hevur ynskt, vísandi til §151 í Skattalógini um tagnarskyldu, at hvørki frágreiðing ella niðurstøður verða almannakunngjørdar. Fíggjarmálaráðið er ikki samt í hesum og metir, at meginparturin av høvuðsniðurstøðunum kunnu almannakunngerast."