Fara nú at viðgera kæruna um rektaran á Glasi

Mentamálaráðið fer at viðgera kæruna um Boga Bech Jensen, rektara á Glasi, eftir 10. august.

Bogi Bech Jensen hevur fingið kæruna til hoyringar, og freistin at gera viðmerking er 10. august. 

Tá fer Mentamálaráðið at viðgera bæði sjónarmiðini hjá teimum, sum hava kært, og ummælið frá rektaranum, og síðani koma við einari niðurstøðu.

Lærarar og starvsfólk hava kært

Lærarar og starvsfólk á Glasi í Hoydølum og Marknagili hava kært rektararan til landsstýriskvinnuna í mentamálum.

Kæran er samanlagt 16 síður, og kært verður um 11 viðurskifti - millum annað bygnaðin, arbeiðsumhvørvið, leiðslustílin hjá rektaranum og um, at fólk hava fingið múlaband.

Í kæruni stendur eitt nú, at rektarin ikki ber boð um demokratiskan leiðsluform, tí starvsfólkini kenna á sær, at tey hava ikki fingið høvi at kjakast um samanleggingina á Glasi. 

Ikki lýst leys

Og eisini finnast starvsfólkini at, at Bogi Bech Jensen hevur sett fólk í starv, uttan at størvini eru  lýst leys.

Og at rektaran ikki er nóg tilvitaður um, at Glasir er ein bóklig útbúgving, stendur í kæruni. 

Sjey fólk hava skrivað undir kæruna, sum er dagfest 23. juni í ár.

Tey siga, at fleiri onnur taka undir við atfinningunum, og eru til reiðar at stuðla, um kæran skuldi fingið keðiligar avleiðingar fyri onkur teirra, ið hava sett navn undir kæruna.