Kanningarstjóri: Eik helt upplýsingum aftur

- Tað er rættiliga sannlíkt, at leiðslan í Eik hevur afturhildið upplýsingar fyri TAKS í 2013, fyri at sleppa undan at rinda skatt.

Tað stendur í tí partinum av niðurstøðuni hjá Bárði Larsen, bráðfeingisstjóra á TAKS, sum ikki varð almannakunngjørd, tá hann hevði latið Fíggjarmálaráðnum frágreiðingina um skattamálið.

Men kanningarstjórin tekur tó ikki endaliga støðu til, um Eik hevur villleitt ella ikki. Tað má fútin gera av.

Torben Nielsen, formaður í nevndini fyri Betri banka, sigur í sms-boðum til Kringvarpið, at hann hevur ikki fleiri viðmerkingar enn tað, Betri banki hevur sent út í tíðindaskrivi.

Í tíðindaskrivinum, sum Betri banki sendi, tann dagin frágreiðingini varð almannakunngjørd, segði bankin, at í kanningini av skattamálinum sáar Bárður Larsen, kanningarstjóri, iva um leiklutin hjá Betri banka í hesum máli.

Bankin kann ikki hava henda ivan sitandi á sær. Tí vil nevndin, at málið verður latið fútanum, soleiðis at ein óheft rættarlig meting kann verða gjørd.