Danir fáa ikki nebbasildina til høldar

Danska fiskivinnan megnar ikki at fáa alla kvotuna av nebbasild til høldar.

Hóast sera góðan fiskiskap, eru 100.000 tons av nebbasild eftir at fiska, nú vertíðin er av.

Donsk skip hava fiskað 355.000 tons av nebbasild í ár, og tað er størsta nøgdin í meira enn 10 ár. Men samlaða kvotan er 458.000 tons í ár.

- Okkum tørvar orku, bæði á sjógvi og landi, og tørvur er eisini á skipum og verksmiðjum, sigur Svend Erik Andersen, formaður í Danmarks Fiskeriforening.

Stór sveiggj

Hann vísir á, at síðstu árini hava sveiggini verið stór, tá kvoturnar av nebbasild og øðrum ídnaðarfiski hava verið ásetar. Tað hevur máað grundarlagið undan verksmiðjunum á landi, og nú eru bara tríggjar stórar verksmiðjur eftir, sum taka ímóti ídnaðarfiski, ið verður gjørdur til mjøl og lýsi.

Verksmiðjurnar eru í Thyborøn, Hanstholm og Skagen.

Hóast rokfiskiskap í summar, hava donsku skipini ikki fingið fulla úrtøku burturúr, tí nógv tíð er farin við at bíða eftir at sleppa framat at landa.

Felagið hjá donsku fiskivinnuni vónar tí, at ídnaðarkvoturnar næstu árini fara at vera meira støðugar, soleiðis at grundarlag verður fyri at byggja út móttøkuorkuna á landi.