Vatnflóð kravt 1200 mannalív í Asia

Samstundis sum øll heimsins eygu eru vend móti vatnflóðini í Houston í amerikanska statinum í Texas, hóttir ein nógv størri náttúruvanlukka í India, Nepal og Bangladesh.

Tað hevur regnað av grimd í stórum pørtum av landsynningsasia, og vatnflóðin hevur kravt meira enn 1200 mannalív í hesum trimum londunum.

Skúlar og sjúkrahús hava latið aftur, og nógvar seinkingar eru í floghavnunum, skrivar Reuters.

Tað regnar av grimd, ið hvussu er eitt samdøgur aftrat.

16 milliónir rakt

Vatnflóðin í landsynningsasia hevur rakt í minsta lagi 16 milliónir fólk.

Bara í indiska landspartinum, Bihar, eru meira enn 500 fólk deyð. 

Í Bangladesh eru 134 fólk deyð, og fleiri milliónir fólk hava einki reint drekkivatn, skrivar Independent.

Í Nepal eru 150 fólk deyð, og 90.000 hús eru løgd í oyði.

ST sigur, at vatnflóðin í landsynningsasia er tann ringasta í áratíggju.